當Unreal很Real，世界就Running Man了
前個星期，睇見好多科技網媒都在報道，遊戲引擎Unreal Engine如何實時演算一個數碼人類Siren的表情動作，雖然面目和動作仍有點膠，但已是逼真得很，有片為證。
自從照相技術出現，有些被歸類為超級寫實主義（Hyperrealism）的藝術家，就用了超級像真的畫作來詰問，什麼是真？假如繪畫只是要追求相片一樣的真實，意義何在？當你的眼目被蒙蔽到分不出真假，你要如何作判斷？
而當這種超級真實的影像，從硬照的領域跳進影片的世界，這番詰問是進一步的嚴峻了，特別是當我想到阿諾舒華辛力加很多年前主演的《威龍猛將》（The Running Man, 1987）。（唔係嗰套韓國綜藝呀，朵晒～～）
個故仔係由Steven King用筆名Richard Bachman所寫的同名小說改篇，不過睇簡介呢，都應該改得幾勁，特別係阿諾所飾演的主角Ben Richards，之所以會參加The Running Man這個電視遊戲比賽節目，由原本係為個女籌醫藥費，變咗係畀政府砌生豬肉。
講番個故仔設定先。呢套1987年上映的電影，故事發生在2017年。（係呀，我哋已經超前咗未來喇。）當時個世界乜都唔掂，經濟崩潰，包括食物在內的各種天然資源都短缺，國家變成由警權操控，實行準軍事式的鐵腕管治。
當時電視節目已由國家全面收編，任何內容必須經過審查，而The Running Man這個虐殺參加者的大型遊戲節目則大受歡迎。參加者係司法部從死囚中挑選出來，只要他們跑完整條賽道，不單能重獲自由，唔少得嘅當然有陽光海灘獎金獎品。但要完成整條賽道，就必須過關斬將，打低從後追殺上來的大佬，死唔去至再講。
阿諾在戲中原本是警方的直升機機師，因為一次清場行動中，反對向手無寸鐵的示威者開槍，被同僚打暈制伏，並用上影像模擬技術，製作了一條阿諾在執勤時向示威羣眾開槍鎮壓的影片，令到睇慣The Running Man的亢奮觀眾信以為真，對阿諾頻呼抵死。
